2Jo | KWJ | STEP |

JON TO RUMBWERO CHENGI FISI

2 John

1 Ani sios mekupu hima rito do chengi Gotri rihi ri nasiro himiyama, nini, ga ni che lenga, kunu ni a kaindau. Ani kunu keke mwe naha a wondau. Woro andombwa, mina, Gotri mwanji mwe naha ni hambwandau hima le okwe tinda wunu kunu keke wu wondau. 2 Hinde wowani, Gotri mwanji mwe naha oti nunu ki dasini ichekai nunu ga o ete da ete dakonda. 3 Yapai Gotri ga ri Che ri Jisas Kurais ga findo hima keke woni okulandau sumbu fihi tinga sembe wahapi sumbu fihi tinga mwanji mwe naha ki bwandani hima le keke wondau sumbu ni sirinandau hima, nunu ni o fi hakonda.

Hima keke wo sumbu tini ma nu sirina

4 Nui Yapai Gotri nu sirina kinani nunu sawendiriro mwanji tini, ni che fwele wu sirinandani Gotri numbo mwe naha ki wu ichi'uchandau, woro o wui mwanji ni a mendini omwesika naha ani eripe'aripendau. 5 Nini, himiyama, ka hinga nini a sawenda: Nunu nui hiparakambwe lenga ma nu anakekewonda. Woro do mwanji sawendiri mwanji anandi tini nini a kainda nambwe. Mina. Imbihumbwa nu torono sawendiri mwanji ni a kaindau. 6 Hima keke wondau sumbu mu mwe ti ka hinga: Nunu ele Gotri sawendiri mwanji ni ma nu sirinani nu ichi'uchanda. Imbihumbwa kunu tinda ku mendiro Gotri sawendiri mwanji oti ka: Hiparakambwe le keke wondau sumbu tini ma nu okokonani nu sirinanda.

Nunu Kurais mwanji tini ma nu toronambu

7 Hima miyafo nunu gambo kinani do nuwe ki wu sukwasini ele wu ichi'uchanda. Wunu ka hinga wu sawendau: “Jisas Kurais rini hima minde hinga ri sira nambwe.” E, hima fori o hinga ri sawewa, rini nimba gambo hima, Kurais miho. 8 O keke kunu hambwafwa'aisi. Foki ele mwa'ambwe ku toro kinani tau kwambu ku randaro ti ku hanja'ai ki. O hinga mina, ku hambwafwa'aisini ma ete ku randawa o gisi sa tawa mwa'ambwe wasa kipe naha ti ku toro. 9 E, hima fori Kurais mwanji ni ri toronambu nambwe o tini ri hanja'aisini mwanji ba foki ri ai iwa, Gotri rini ga hinde da kumbwa. E, hima fori Kurais mwanji ni kwambu tiki ete ri toronambusini dau ti, opi Che Yapai rini ga dau. 10 E, hima fori kunu tambwa tani do Gotri mwanji kipe ni kunu ri sawe nambwe nawa, apa kui aka ki rini ku ra'ai kei. Rini ku wese'ano mwanji okwe bwa kei. 11 Hinde wowani, hima fori o hima hinga ni ri wese'awa, o ri randau tau kapwa tini mi ohounaro hinga ya sukwakonda.

Mwanji tipa fwele

12 Kunu a sawehambwa ki ani hambwandau mwanji miyafo naha a torosindau, woro mwanji miyafo chengi ki a kaino ti a diyahanda. Hinde wowani, ani nimba a tani kunu ani heini takisopo mwanji ki nu anambwa ki ani hambwandau, wowa kipeheki sumbu nunu ki funda tale ki.

13 Gotri ni hipache ni rihi minde ri nasiro ti, woro do hipache ti che le wese'a wuhi ti nini wu rumbwenda.